“Export-Import” банк “Оюутолгой” төслийг 500 сая ам.доллараар санхүүжүүлнэ

“Оюутолгой” төслийн бүтээн байгуулалтын хоёрдугаар шатанд шаардагдах хөрөнгийг “Rio Tinto” групп олон улсын банкуудаас татахаар төлөвлөж буйг бид өмнө нь мэдээлсэн билээ. Тэгвэл тэдэнтэй хамтрахаа амлаад байсан АНУ-ын “Export-Import” банкны ТУЗ 500 сая ам.долларын зээл олгохоор шийдвэрлэснээ мэдэгдэв.
Тус улсын Худалдаа, хөдөлмөрийн яамны аргачлалаар тооцоход уг зээл АНУ-д 2000 орчим ажлын байр шинээр нэмэгдүүлэх боломжтой гэнэ. “Энэ санхүүжилт Америкийн ажил эрхлэлт, эдийн засгийг дэмжээд зогсохгүй Монголын ДНБ-ий өсөлтөд шууд нөлөөлөх юм” хэмээн “Export-Import” банкны ерөнхийлөгч Фред Хочберг тэмдэглэжээ.
Түүнчлэн тэрбээр “АНУ-д үйлдвэрлэсэн бүтээгдэхүүнийг энэ том төсөлд ашигласнаар уг санхүүжилт Аризона, Колорадо, Иллинойс, Нью-Йорк, Техас мужид хоёр мянган ажлын байр шинээр бий болгоно” хэмээн ярьсан байна.

Б.ЦЭЦЭГСҮРЭН