www.uuluurhai.mn Уул уурхай.мн
“Оюу Толгой”-ийн хөрөнгө оруулагч “Turquoise Hill Resources”-ийн хувьцааны ханш зургаа дахь өдрөө дараалан буурсан нь 2018 оны хоёрдугаар сараас хойших анхны тохиолдол болж байна.
Өнгөрсөн оны аравдугаар сард “Rio Tinto” компани “Оюу Толгой”-ийн гүний уурхайн бүтээн байгуулалтын ажил хойшлох төлөвтэй байгаа талаар мэдэгдсэнээс хойш “Turquoise Hill Resources”-ийн хувьцааны ханш буурсан байна.
Тавдугаар сарын эхээр АНУ-ын Ерөнхийлөгч Дональд Трамп БНХАУ-ын импортын бүтээгдэхүүнд ногдуулах тарифаа нэмэгдүүлэхээр болсноо зарласны дараа Хойд Америкийн хувьцаанууд огцом унажээ.
Үүнээс гадна “Turquoise Hill Resources”-ийн жижиг хувьцаа эзэмшигчид компанийн засаглалаа шүүмжилсээр ирсэн бөгөөд хамгийн сүүлд жил тутмын уулзалтаар “SailingStone Capital Partners” гол захирлуудынхаа эсрэг санал өгсөн нь анхаарал татаж байлаа.
Харин “Turquoise Hill Resoures”-ийн 51 хувийг эзэмшигч “Rio Tinto”-ийн хувьцааны ханш нь 4.8 хувиар өссөн нь сүүлийн хоёр жил гаруйн хугацааны анхны тохиолдол болж байна. Даваа гарагийн арилжаа хаагдах үед “Rio Tinto”-ийн хувьцааны ханш 107.96 австрали доллар боллоо. Мөн арилжсан хувьцааны тоо ширхэг нь сүүлийн 20 өдрийн дунджаас давж гарсан байна. Goldman sachs-ын шинжээч “Rio Tinto”-ийн хувьцааны зорилтот ханшийг 108.4 австрали доллар гэж тогтоож, үнэлгээ нь “Neutral” байсныг нэмэгдүүлж, худалдан авахыг санал болголоо. Хувьцааны ханш нь сүүлийн 52 долоо хоногт 24 хувиар өсжээ.
Үүнээс гадна “Rio Tinto”-ийн гол түүхий эд болох төмрийн хүдрийн ханш хурдацтай өсөж байгаа бөгөөд өнгөрсөн долоо хоногт БНХАУ-ын агуулахууд дахь нөөц гурван хувиар буурч, 127.8 сая тонн болсон нь сүлийн хоёр жил гаруйн хамгийн бага түвшинд хүрчээ.
Дээрх мэдээллийн дараа Далянийн Таваарын биржид фьючерс ханш сүүлийн таван жилийн оргил цэгт хүрсэн байна. Сингапурт зургаадугаар сарын фьючерс ханш 5.1 хувиар өсөж, 106.08 ам.доллар болсны дараа зөвхөн “Rio Tinto” гэлтгүй төмрийн хүдэр олборлогч “Fortescue Metals”-ийн ханш ч мөн өссөн байна.
Т.Элиса | @elisa_elisat
BloombergTV.mn
